တ ရုတ်အထူးကိုယ်စားလှယ် ကြိုတင်ကြေညာမှုမရှိပဲ မြန်မာခရီးစဉ်မှာ မင်းအောင်လှိုင်နဲ့တွေ့

တ ရုတ်အထူးကိုယ်စားလှယ် ကြိုတင်ကြေညာမှုမရှိပဲ မြန်မာခရီးစဉ်မှာ မင်းအောင်လှိုင်နဲ့တွေ့

၁ စက်တင်ဘာ ၂၀၂၁

တရုတ်နိုင်ငံ အာရှရေးရာ အထူးကိုယ်စားလှယ်ရဲ့ သီတင်းတပတ်ကြာ မြန်မာနိုင်ငံခရီးစဉ်မှာ မြန်မာစစ်ခေါင်းဆောင်နဲ့ တွေ့ဆုံခဲ့ပါတယ်။ အာရှဆိုင်ရာ အထူးကိုယ်စားလှယ် ဆွန်ကော့ရှင် ရဲ့ သြဂုတ်လ ၂၁ ရက်နေ့ကနေ ၂၈ ရက်နေ့အထိ ခရီးစဉ်အတွင်း မြန်မာစစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံပြီး အမြင်ဖလှယ်ခဲ့ကြောင်းလည်း မြန်မာနိုင်ငံမှာရှိတဲ့ တရုတ်သံရုံးရဲ့ အင်္ဂါနေ့က ထုတ်ပြန်ချက်ကို ကိုးကားပြီး AFP သတင်းက ဖော်ပြခဲ့တာပါ။

မြန်မာနိုင်ငံမှာ လူမှုရေးအရ ပြန်လည်တည်ငြိမ်အောင် ကြိုးပမ်းမှုတွေနဲ့ ဒီမိုကရေစီဖေါ်ဆောင်ရေး အမြန်ဆုံး ပြန်လည်စတင်နိုင်ဖို့ ကြိုးပမ်းမှုတွေကို တရုတ်နိုင်ငံက အားပေးကြောင်းလည်း ထုတ်ပြန်ချက်မှာ ဖော်ပြထားပါတယ်။

ကြိုတင်ကြေညာထားတာ မရှိပဲ သွားရောက်ခဲ့တဲ့ တရုတ်အထူးကိုယ်စားလှယ်ရဲ့ ခရီးစဉ်မှာ စစ်အာဏာသိမ်းပြီးနောက်ပိုင်း ဖမ်းဆီးခဲ့တဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ အာဏာသိမ်းပြီးနောက်ပိုင်း လွှတ်တော်ကိုယ်စားလှယ် အချို့ပါဝင် ဖွဲ့စည်းထားတဲ့ NUG အမျိုးသားညီညွတ်ရေး အစိုးရအဖွဲ့ဝင်တွေနဲ့ တွေ့ဆုံမှု ရှိ၊ မရှိ ဆိုတာကိုတော့ ထုတ်ပြန်ချက်မှာ ဖော်ပြမထားပါဘူး။

မြန်မာနိုင်ငံမှာ ဖေဖော်ဝါရီလ ၁ ရက် စစ်အာဏာသိမ်းပြီးနောက်ပိုင်း နိုင်ငံရေး အကျပ်အတည်းတွေ ပေါ်ပေါက်နေချိန်မှာပဲ တရုတ်အထူးကိုယ်စားလှယ် မြန်မာနိုင်ငံကို သွားရောက်ခဲ့တာပါ။

မြန်မာနိုင်ငံမှာ အရပ်သားအစိုးရကို ဖယ်ရှားပြီး အာဏာသိမ်းတဲ့ လုပ်ရပ်အတွက် မြန်မာစစ်ခေါင်းဆောင်တွေကို ကုလသမဂ္ဂ အပါအဝင် နိုင်ငံတကာ အသိုင်းအဝန်းက ဖိအားပေး အရေးယူဖို့ ကြိုးပမ်းမှုတွေကိုတော့ တရုတ်နဲ့ ရုရှားနိုင်ငံတွေက ကန့်ကွက်ထားကြပါတယ်။

ဗီအိုအေ