ဒေါ်အောင်ဆန်းစုကြည် ရင်ဆိုင်နေရတဲ့ အဂတိမှု နောက်ဆုံးအခြေအနေ

ဒေါ်အောင်ဆန်းစုကြည်ကို အဂတိလိုက်စားမှုနဲ့ တရားစွဲထားတဲ့ အမှုတွေနဲ့ ပတ်သက်ပြီး နှစ်ဖက် အပြန်အလှန် စစ်ဆေးမေးမြန်းခဲ့တာမှာ တရားလိုတွေဘက်က သက်သေအခိုင်အမာ ပြသနိုင်ခဲ့ခြင်း မရှိဘူးလို့ ဒေါ်အောင်ဆန်းစုကြည်ရဲ့ ရှေ့နေတွေဘက်က ပြောလိုက်ပါတယ်။ ပြီးခဲ့တဲ့တပတ်အတွင်း ဒေါ်အောင်ဆန်းစုကြည်ရဲ့ တရားရုံး ကြားနာစစ်ဆေးမှုတွေနဲ့ ပတ်သက်ပြီး ကိုရန်နိုင်က စုစည်းတင်ပြထားပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စွဲဆိုထားတဲ့ အဂတိလိုက်စားမှုဆိုင်ရာ အမှုတွေနဲ့ ပတ်သက်ပြီး ပြီးခဲ့တဲ့ သောကြာနေ့ကတော့ နှစ်ဖက်ရှေ့နေတွေက တရားလိုဘက်ကို Cross Examinations လို့ခေါ်တဲ့ အပြန်အလှန် မေးခွန်းတွေနဲ့ စစ်မေးခဲ့ကြပါတယ်။

ဒီအမှုမှာ တရားလိုတွေဘက်က အဂတိတိုက်ဖျက်ရေးကော်မရှင် တာဝန်ရှိသူတဦးဖြစ်တဲ့ ဦးရဲထက်နဲ့ တရားလိုပြ သက်သေတဦးဖြစ်တဲ့ NLD အစိုးရလက်ထက် ရန်ကုန်တိုင်းဝန်ကြီးချုပ်ဖြစ်တဲ့ ဦးဖြိုးမင်းသိန်းတို့ကို မေးမြန်းခဲ့တာမှာတော့ သက်သေအခိုင်အမာ ပြသနိုင်ခဲ့ခြင်း မရှိဘူးလို့ ဒေါ်အောင်ဆန်းစုကြည်ရဲ့ ရှေ့နေတဦးဖြစ်သူ ဦးကြည်ဝင်းက ပြောပါတယ်။

“ပေးတယ်သာပြောတာ ရက်စွဲတွေ မမှတ်မိဘူးပေါ့၊ ရက်စွဲမမှတ်မိဘူး ဆိုတဲ့ဟာကို ကိုယ်က အဓိကထားပြီးတော့၊ အကယ်၍ ဒါမျိုးက ကာယကံရှင်က ပေးတယ်ဆိုရင် သူ မှတ်ထားရမှာပေါ့ ဘယ်နေ့ ဘယ်ရက်ဆိုတာ။ သူ မှတ်မှမထားနိုင်တာ။ ဒါပေမယ့် တရားလို ဦးရဲထက်ကတော့ သူက ရက်စွဲတွေနဲ့ မှတ်ထားတယ်။ သူက တကယ်သိတဲ့လူလည်း မဟုတ်ဘူး။

သက်သေတွေ စစ်ပြီးမှ သိတဲ့သူဆိုတော့ တဆင့်ကြားသိတဲ့သူက ထွက်ထားပြီးတော့ တကယ်သိတဲ့လူ ဦးဖြိုးမင်းသိန်းက မပြောခဲ့ဘူး။ ရက်စွဲပါလား၊ ရက်စွဲအတိအကျ သိလားဆိုတော့ သူ ရက်စွဲတော့မသိဘူး။ လကို သူသိတယ်။”

ဦးဖြိုးမင်းသိန်းက ဒေါ်အောင်ဆန်းစုကြည်ကို အကယ်ဒမီအခေါက်ရွှေ ၇ ပိသာနဲ့ အမေရိကန်ဒေါ်လာ ၆ သိန်းကို ၃ ကြိမ်ခွဲပေးခဲ့ရတယ်လို့ ထွက်ဆိုခဲ့ပေမယ့်လည်း ပေးခဲ့တယ်ဆိုတဲ့ ရက်စွဲအတိအကျကို ထွက်ဆိုနိုင်ခဲ့ခြင်း မရှိသလို ဒေါ်အောင်ဆန်းစုကြည်ဆီကလည်း အဲဒီပစ္စည်းနဲ့ ငွေတွေကို သိမ်းဆည်းရမိတယ်ဆိုတာ ရှာဖွေပုံစံ သက်သေအထောက်အထားနဲ့ ရုံးတော်မှာ သက်သေပြသနိုင်ခဲ့ခြင်း မရှိပါဘူး။

ဒါ့အပြင် ဒီကြားနာစစ်ဆေးမှုအတွင်း နောက်ထပ်တချက်ကတော့ ဦးဖြိုးမင်းသိန်းဟာ စစ်တပ်က ဖေဖော်ဝါရီ ၁ ရက် အာဏာသိမ်းချိန်ကစပြီး သူ့ကို ဖမ်းဆီးထိန်းသိမ်းထားတယ်ဆိုတာ ထွက်ဆိုသွားခဲ့သလို NLD ဗဟိုအလုပ်အမှုဆောင်အဖွဲ့ (CEC) တွေထဲက ဝန်ကြီးချုပ်တွေထဲမှာ ကျန်တဲ့ဝန်ကြီးချုပ်တွေကို တရားစွဲထားပေမယ့် ဦးဖြိုးမင်းသိန်းကို တရားစွဲဆိုထားခြင်းရှိမရှိ ဆိုတာနဲ့ ပတ်သက်ပြီး မေးမြန်းတဲ့အခါမှာလည်း ဦးဖြိုးမင်းသိန်းက သူ့အပေါ်မှာ အခုချိန်ထိ တရားစွဲဆိုထားခြင်း မရှိဘူးလို့ ထွက်ဆိုသွားခဲ့ပါတယ်။

ရာဇဝတ်ကျင့်ထုံး ဥပဒေပုဒ်မ ၁၆၂ (၁) အပြင် သက်သေခံဥပဒေပုဒ်မ (၂၄)၊ (၂၅)၊ (၂၆)၊ (၂၇) မှာ ပြဋ္ဌာန်းချက်အရတော့ ရဲအချုပ်၊ ရဲလက်အောက်မှာ ဖမ်းဆီးထိန်းသိမ်း ခံထားရတဲ့သူရဲ့ ထွက်ဆိုချက်ဟာ သက်သေမဝင်ဘူးလို့ ဖော်ပြထားပါတယ်။ ဒါကြောင့် ဦးဖြိုးမင်းသိန်းဟာ လက်ရှိမှာ စစ်ကောင်စီက ဖမ်းဆီးထိန်းသိမ်းထားတာ၊ ထိန်းချုပ်မှုအောက်မှာ ရှိနေတဲ့အတွက် သူ့ရဲ့ထွက်ချက်ဟာ ဥပဒေသဘောအရ သက်သေခံလို့ မရဘူးလို့ ဥပဒေပညာရှင်တွေနဲ့ ဥပဒေပညာဆိုင်ရာ သုတေသီတွေက ပြောပါတယ်။

တချိန်တည်းမှာပဲ စစ်ကောင်စီဘက်ကတော့ ဒေါ်အောင်ဆန်းစုကြည်ကို အဂတိလိုက်စားမှု နောက်ထပ် ၃ မှုနဲ့ ထပ်စွဲဖို့ လုပ်နေပါတယ်။

ဒီတပတ်မှာ နောက်ထပ် ထူးခြားတာတခုကတော့ အခု တရားစွဲထားတဲ့ အမှုတွေဟာ ဗုဒ္ဓဟူးနေ့ကလွဲပြီး တပတ်ကို လေးရက်နဲ့ နေ့တိုင်းလိုလို တရားရုံးမှာ ရုံးချိန်းသွားနေရတာကြောင့် ကျန်းမာရေးအရ တပတ်ခြားတခါ စစ်ဖို့ ဒေါ်အောင်ဆန်းစုကြည်ကိုယ်တိုင် တရားရုံးကို တောင်းဆိုခဲ့သလို ရှေ့နေတွေကလည်း တောင်းဆိုခဲ့ပါတယ်။ ဒါနဲ့ပတ်သက်လို့ တရားရုံးက ဆုံးဖြတ်ချက် မပေးသေးပါဘူး။”

Crd-Original Post